.إمبارح كان عيد ميلادها
إتأخرت عليها يوم .. :(
عشان كل جمعه بكون في القاهرة يوم كامل عشان الجامعة ...
^^
بجد .. بحبها أوي ..
عزيزة على قلبي أوي أوي
لو حصلّها حاجة ممكن يحصلّي حاجة أنا كمان ...
^^
ياترى أنا بحبها أوي كدة ليه ..؟!!
يمكن عشان بحكيلها اي حاجة أنا عايزة أقولها
وهي بتسمعني بصمت لذيذ .. !!
أو يمكن عشان بسببها إتعرفت على ناس والله
عمري ماهلاقي زيهم .. !!
ولا يمكن عشان من خلالها بعرف أحسّن نفسي
في كتاباتي وأفكاري .. !!
وأكيد عشان بسببها الناس بتشاركني فرحي
وتواسيني في أحزاني ... :)
^^
دي كمان علمتني حاجات كتير
زي إية ..؟
علمتني إزاي اشارك برأي في أي حاجة تهمني
أو تهم المجتمع إللي أنا فيه ..
علمتني إني ماتكسفش وأنشر ماأظن إنه شيء من الإبداع ...
دي كمان عرفتني بناس بيحبوا الخير
ومن خلالها أول مرة بجد أحضر أعمال خيرية وأشارك فيها
بجد الإحساس ده لوحدة لا يوصف
وراح يكذب إللي يقول إنه قادر يوصفه
^^
ياترى عرفتوا أنا بتكلم على مين
... ؟!!
أيوه أكيد طبعا عليها
بتكلم على إللي كانت وجه السعد عليا
تخيلوا كملت سنة بحالها :)
ياترى هاحتفل كم مرة بعيد ميلادها كمان ..؟
أنا مش عايزة أبعد عنها ولا عن صحابها
عشان أنا أدمنتها وأدمنتهم
يمكن بغيب عليها وعليهم كل فترة والتانيه
بس ده مش معناة إني مش بطّل عليها وعليهم
كل ماتوحشني ويوحشوني ...
^^
أوعوا تكونوا ماعرفتوش بتكلم على إية .. :)
أنا بتكلم على " بستاني " منبت " أفكاري " ...
إللي كل مازرعت فيه حرف أو كلمة أو فكرة ..
حصدت مكانه خبرة ونقد بناء ومعلومة وأصدقاء ...
^^
كل سنة وإنتي بستاني يامدونتي ..
كل سنه وإنتي مُلهمتي ..
^^
ممكن تقولولها وتقولولي كل سنة وإحنا طيوبين :)
عشان أنا هي وهي أنا ...
^^
ماتقلقوش مش ناسية
البوفية أول ماتدخل على اليمين
وحمزة نمرة واقف يغنيلها على الشمال
وأنا واقفه طايرة من الفرحة في النص ...
ملحوظة صغنتوتة :
بالله عليكوا بلاش تكسفوني
وإعتبروا كل إلي قولته إنه حصل وموجود
وعدوا الليله على خير :))))))))
.......................
كان معكم
من دواخل النفس الغداوية
غادة محسن
^_^
.jfif)
