Wish whatever yOu wanna wish .. cOz all yOur dreams can be reached ... GHADA
... ;) ,,, ;) ...

السبت، 10 أبريل 2010

تحديث : يامدونيجية الخير :) ...


ماأجمل أن يكون هناك تواصل للخير ...


أُناس تجتمع وفي قلبها مودة ورحمه وطيبه ...


نجتمع وننسى حينها همومنا ومشاكلنا ونرميها


جميعها وراء ظهورنا ولانبالي ...


أسأل من الله أن يجمعنا دائما على خير ...


..


ندخل بقى في المفيد ...


يوم الجمعه ...



أنا بقى صحيت من الفجر عشان أتجهز


للسفر للقاهره عشان عندي محاضرات من الساعه 8 الصبح ( وااااااااااااااء ) ...


ومعايا أختي رانيا ....


أصلا بعيد عنكوا رحلة كفاحنا بدأت من تاني ... والأجازه خلصت :( ...



المهم حضرت محاضراتي مع أعز أصدقائي إللي من غيرهم ماكنت أصلا


أفكر إني أعتب الجامعه ولا حتى أحضر محاضرات ..


فكانوا مقررين يجوا معايا لقاء المدونيين عشان يشوفوا عالمي الجديد إللي بعشقه


ودايما بكلمهم عنه ... وتشجعوا أكتر عشان فيه عمل خيري جزاهم الله خير ..


وإللي مقدرش يجي من زمايلي إعطاني فلوس وجمعناها كلنا مع بعض ...



ومشينا من الجامعه متوجهيين لمستشفى ( أبو الريش ) الساعه 1 كلا من

( أنا .. أختي رانيا .. رحاب صالح ( حياتي .. لكن مش حره فيها ) .. رضا .. وأحمد وافي )



ووصلنا ومكناش عارفين ندخل من وين بتاتا ...


فاستنجدت بأخويا وليد (هي وظروفها ) عشان ينتشلنا من التوهان :))) ...

ودخلنا المستشفى وقعدنا مع أحبابنا المدونيين

البعض كان مألوف ليا من أيام لقاء (الدقي )

فانبسطت إني شوفتهم تاني ... وإتشرفت بمعرفة الناس الجديده بالنسبه ليا ..



وليد ( هي وظروفها ) الأخ الجدع بجد ..

إللي قعد يعزم علينا بسندويتشات الكبده :) ...

ويكلم ده ويروح لده بجد بيحسس الواحد أنه يعرفه من زمان
وبيكسر أي تكليف ...

بجد مبسوطه إني شوفتك تاني ...



فاتيما حبيبة قلبي من جوه .. القلب إللي كله حنيه ...
إللي مش بتنسى حد وبتفرح لفرحنا وبتزعل على ألامنا ...

إنبسطت كتير إني شوفتك تاني وكلمتك ...

أه صحيح .. وبشكرك كتير إنك مش نسيتيني بنجاحي

بأحلى مصاصتين :) .. على فكره راح احتفظ بيهم

وأشتريلي غيرهم عشان مش هاقدر أقعد أبصلهم كده

دول نقطه ضعفي :))) ..

أهو كشفنا سر من أسرار الدوله ههههههههههههه
..
تحديث : ( أبو حميد ) إللي بجد مش عارفه أشكره إزاي
هو إللي وصلنا أنا وزمايلي ل(نادي المحاميين)
لولاه كنا إتشردنا :))...
بجد هي دي روح المصريين إللي إتعودت عليها
وبتعلم منهم بجد يوم بعد يوم ...
بعتذر منك كتير .. والله حضرتك في بالي
بس للأسف أنا ماأتعرفت على إسمك
وهذي غلطتي ...
بتمنى ماتكون زعلان مني
وتووووبه وأخر مره :) ...



ضيا ( بيوتيفل مايند ) وجه بشوش .. ودم خفيف ...

وإتشرفت بجد بمعرفتك ...



شريف باشا ( هجايص ) .. طيب أوي وجدع ...

تعبناك والله معانا ... بجد بشكرك على توصيلك ..

مارضاش يمشي إلا لما ركبت أنا وزمايلي ...

بجد إتشرفت بمعرفة شخصيه زيك ...


أستاذ خالد ( همس الأحباب ) .. مبسوطه إني شوفتك تاني

وبجد طيب أوي وعفوي ودم خفيف ...

بس ماقولتليش برضو عصير البرتقال بكااااام .. :))))

بجد بشكرك كتييير ...


أستاذ عمر ( واحد من الناس ) .. سعدت بالدقيقتين

إللي تكلمت فيهم مع حضرتك ... وتيجي تنور طنطا إن شاء الله

وربنا يوفقك في شغلك ...



نوران ( بنت خيخه وأي كلام ) .. في لقاء الدقي ماجتش فرصه

وأتعرف عليكي ... بس المره دي بجد إكتشفت إنك شخصيه طيبه أوي وجدعه

وصاحبة روح مرحه ... وإن شاء الله يارب اشوفك تاني ...



مصطفى ريان .. بحس إن راح يكون ليه مستقبل باهر في مجال الأدب

ماشاء الله عليك ربنا يوفقك ... وكل سنه وإنت طيب .. ودائما في نجاح



كيارا ... بنوته عسوله أوي ماجاتش فرصه أتكلم معاكي

بس إن شاء الله مره تانيه ... وربنا يحفظك ...



كيكي ... ماكنتش أعرف في الأول إنك كيكي عوووووو ...

بس وإحنا في نادي المحاميين سألت شريف عشان أتأكد

وقلي بالفعل إنك كيكي عووووو ...

بس وقتها إنتي كنتي ملخومه بالجوافه الحمضانه والمانجه :)))

بس بجد روحك حلوه وطيوبه أوي ...



بعتذر إذا كنت نسيت أحد ...



بس بجد بشكركم أول شي على إستقبالكم لزمايلي

والحمدلله كلنا كنا مبسوطين ... وروحنا وعلى وجوهنا إبتسامه .

مع إن صديقتي الصدوقه رحاب صالح كانت تعبانه بس الحمدلله

وصلت لبيتها بأمان وسلام .. ربنا يحفظك حبيبتي .. بجد كنت قلقانه عليكي ..

كان في ناس كتييييير كان نفسي أشوفها في اللقاء ده

بس للأسف ماجوش ... بس الجيات أكتر من الرايحات

والحمدلله إن إللي إتمنيناه بالخير إتحقق وجمعنا المبلغ المطلوب بفضل الله ...

جزاكم الله بالخير يأهل الخير ...
طبعا بشكر داليا قوس قزح على أحلى خير
إللي بيجري بدمها
وللأسف ماجاتليش الفرصه عشان أتعرف عليها


بحكبم في الله وأشوفكم على خير مره تانيه ياأحلى مدونيجيه :) ...
غاده محسن ...
... ;) ,,, ;) ...