Wish whatever yOu wanna wish .. cOz all yOur dreams can be reached ... GHADA
... ;) ,,, ;) ...

الثلاثاء، 24 أغسطس 2010

إتنشرلي مقال في اليوم السابع ودنيا الرأي كمااااان :)


أنا صايم ومش طايق نفسي ..
ـــــــــــــــــــــــــــــــــــــ
.
" أنا صايم .. وماحدش يكلمنى " ...
" ماتخلينيش افطر عليك " ...
" ياأبن ال ....... إستغفر الله العظيم .. اللهم إنى صائم "...

وغيرها من الأقوال والكلمات الخارجه عن السيطره اللى بنسمعها فى الشهر الفضيل ( شهر رمضان ) .
كلنا بنستنى الشهر ده بفارغ الصبر بما فيه من الإكثار من ذكر الله وقراءه القرآن وبما يأتى به من الخير والبركات ...
بس إحنا للأسف بنحوله أحيانا ً لشهر الخناقات والحوادث والشتائم كمان ... وكل ده بحجة " إن إحنا صايمين .. ومش طايقين نفسنا " ...

أكتر أيام الشهر ده بالذات بصحى على صوت خناقه فى الشارع سواء بين أصحاب المحلات وزباينهم أو بين أى إتنين فى الشارع ... وبيبقى سبب المشكله تافه ولا يذكر وكأنه طقس من طقوس رمضان ... وكل ده طبعا ً بحجة " أنا صايم .. ومش طايق نفسي " ...

ونيجي عند سواقين الميكروباص ... ده السواق منهم وهو صايم تلاقيه بيتخانق مع ( دبان وشه ) ... وأقل كلمه ممكن يقولها أى راكب غلبان بعفويه ومن غير قصد ممكن تخلى السواق يقلب الميكروباص بللى فيه .. لدرجه إنى كل مره بحمد ربنا لخروجى من العربيه سالمه وعلى قيد الحياه ... وكل ده برضو بحجة " أنا صايم .. ومش طايق نفسي " ...
وللأسف بيحصل كل ده فى الشهر الكريم ... ده غير الحوادث اللى بتحصل بسبب الإستعجال ... اللى عايز يلحق الفطار واللى مش عارفه وراه إيه ..؟! , وقت الصيام ده بتبقى الناس عامله زى القنابل الموقوته اللى ممكن تنفجر فى وجه اللى يفكر يقربلها ... يعنى من الأخر كده كل واحد يلزم بيته أسلمله ...

متى سندرك أن رمضان هو شهر الصوم والصبر ... شهر الرحمه والموده بين الناس وشهر الكلمه الجميله والمعامله الحسنه وليس الألفاظ والأفعال التى لا تتقبلها حواسنا فاتؤذينا ...

فعن أبي هريرة رضي الله عنه أن رسول الله صلى الله عليه وسلم قال : الصيام جنة , فلا يرفث ولا يجهل , وإن امرؤ قاتله أو شاتمه , فليقل إني صائم - مرتين - والذي نفسي بيده لخلوف فم الصائم أطيب عند الله تعالى من ريح المسك يترك طعامه وشرابه وشهوته من أجلي الصيام لي وأنا أجزي به والحسنة بعشر أمثالها ...
رواه البخارى ..
اللهم أهدينى وأهدي جميع المسلمين ... اللهم أمين ...

بقلم غاده محسن
^_^
.......................
نشر المقال في اليوم السابع
كما نشر في دنيا الرأي
.............................
بعتذر على التقصير الفظيييييييييع

هناك 37 تعليقًا:

  1. مبروك ياغاده على نشر المقال

    وده طبيعى انه يحصل فى رمضان
    اصل احنا بينى وبينك بنعتبر رمضان ده والصيام هم تقيل على قلبنا عشان كده بنبقى مش طايقين نفسنا

    تسلمى ياغاده

    ردحذف
  2. مبروك النشر ياغادة
    ياعزيزتي من لم يسلم الناس من لسانه ويده فما حاجة الله لجوعه وعطشه
    تقبل الله منا ومنك صالح الاعمال

    ردحذف
  3. مبرووك يادودو على نشر المقال
    كلامك صح بس بس دا اكيد مش علشان الصيام
    دا انعدام سلوك اخلاقى
    واحساس بالذنب والتقصير
    فالانسان بيهرب من انه يحاسب نفسه
    فى شهر كريم
    انه بيتعصب على مخاليق ربنا
    لما يقول انا صايم ومش طايق نفسه
    دا على اساس ان كل اللى بيقابلهم مش صايمين ومسيحين مثلا ولا ايه
    حاجه غريبه فى شعبنا
    ربنا يهدى الجميع ويتقبل منا
    اللهم امين
    تحياتى وحبى

    ردحذف
  4. مبروك يا غدغود

    انتى تستاهلى كل الخير يا حبيبتى

    عقبال كل حاجة تكتبيها
    تلقى الأهتمام و القبول و النشر المحترم يا فندم

    خالص ودى
    و فخرنا كلنا بيكى

    ردحذف
  5. الف مبروك
    ربنا يوفقك
    ومزيد من التقدم والنجاح
    تحياتى

    ردحذف
  6. تصدقى يا غادة انا كان ورايا مشووار من اول رمضان

    والله العظيم كنت خايفة انزل لشارع اول مرة احضر رمضان ف بيتنا وحمدت ربنا بصراحة

    بس النهاردة قررت اخرج بقه وامرى لله

    ولقيت الحمد لله المشوار متسهل والدنيا حلوة خالص

    محدش شتم ولا اتخانق تصدقى دى ؟؟

    انا عن نفسى مستغربة اوى يلا الحمد لله

    مع انى بحس ان الشهر ده الواحد بيبقى فيه رايق كده ومش بيبقى عايز يتخانق معرفش ليه فعلا سواقين المكروباصات بيبقوا كده بس يمكن بسبب شغلهم وطبيعته يمكن !!


    الف مليوووووووووون مبرووووووووك حبيبتى

    ويارب دايما موفقة وبخير واسمك لامع كده

    الف مبروك

    ردحذف
  7. مبروك ياغادة الف مبروك

    تستاهلي كل خير

    والمقال تمام التمام

    ربنا يهدي كل صايم ويعرفه يعني ايه صيام

    تحياتي

    ردحذف
  8. الف مبروك يا غادة

    كأنه إتنشر ليا أنا و الله ... من قلبى فرحتلك

    المشكلة الحقيقية إننا كشعب بجد إتغيرنا و أصبحنا بشكل عام أكثر عصبية و أقل تراحما ... يمكن بسبب الضغوط اللى بتزيد ... يمكن بسبب الأوقات الصعبة و الظروف اللى حوالينا
    لكن أنا معاكى إن ده بيحصل أكثر فى رمضان

    ربنا يغفر لنا و للجميع يا رب

    أمين يا رب العالمين

    دمتى بخير

    ردحذف
  9. لكل مجتهد نصيب بارك الله فيك ووفقك لما يحبه ويرضاه اللهم آمين

    ردحذف
  10. غدغوووووودة يا قمر

    الف الف مبروووك حبيبتى بجد فرحانة اوى ليكى

    ويارب دايما فى نجاح فى كل حياتك

    وكل سنة وانتى طيبة وبكل خير حبيبتى

    ورداية لعيونك

    ردحذف
  11. انا اتخنقت
    والله انا جاني احبااااااط
    بقي انا صديقتك وحبيبتك يا غاادة معرفش اكتب لك تعليق الا بعد الهنا بسنة علي راي المثل
    طيب قوليلي اعمل اية ف مدونتك دي قوللي...؟
    عموما مبروووووك يا قمر وفرحنالك اوووي كلنا وطبعا انا كتبت تعليق ع الفيس بوك وكمان ع اليوم السابع بس ده ميمنعش اني اكتب هنا كماااان وده هنا طبعا اهم عشان مجتمع المدونين الحلوين ده
    مبرررروووووك حبيبتي ومستنياكي تاني يوم العيد عشان غدوة السمك والجمبري اللي عازمه عليها جروب الدستور عمرو وشاذلي وميادة وهاجر وابراهيم
    مستنياك انت ومنار ورانيا ...وممنوع الاعتذاااار
    والدعوة مفتوحة يا معشر المدونين لو حابيين تتغدو علي البحر في بلطيم انا قدها وقدود بس اعطوني خبر عشان اعمل حسابكم ....احنا مش نعرف البخل اطمنوا

    ردحذف
  12. الف مبروووووك .....والي مزيد من النجاح والتوفيق دائما .

    ردحذف
  13. مبرووووووووووووووك يا جميل على نشر المقال وعقبال العامود الثابت ان شاء الله ...وكل سنة وانتى طيبة وبخير

    ردحذف
  14. محمد حجازي ...

    الله يبارك في عمرك يارب

    ربنا يهدينا ونعرف نستغل الشهر ده صح ...

    نورتني
    ^_^

    ردحذف
  15. خواطر شابه ..

    الله يبارك فيكي نوجه حبيبتي

    وربنا يتقبل منك ياااارب

    بشكرك كتير على وجودك الدائم
    ^_^

    ردحذف
  16. إيمي ..

    كوكوتي حبيبتي .. الله يبارك في عمرك يارب

    وبجد كلامك كتير صح .. ربنا يهدينا اللهم أمين
    وربنا يتقبل منك ياااارب

    منوراني حبيبتي
    وتسلميلي يارب
    ^_^

    ردحذف
  17. فاتيما ...

    هلا بأحلى فاتيما شافتها عينيا

    والله يبارك في أيامك يارب
    تسلميلي إن شاء الله ..

    ربنا يقدرني ويكون قلمي للحق دائما ..

    بشكرك كتير على كلامك المشجع
    بموت فيكي والله
    ^_^

    ردحذف
  18. همس الأحباب ...

    الله يبارك فيك ايو همس
    وربنا يوفق الجميع اللهم أمين
    نورتني كتير والله
    ^_^

    ردحذف
  19. منونه ...

    طيب والله فرحتيني
    وخليتي عندي أمل
    :)

    بس مش عارفه ليه عمري تقريبا ماخرجت وقت الصيام إلا وأشوف حاجات غريبه المفروض ماتحصل حتى لو كان مشواري صغير ...

    ربنا يهدينا ياااارب

    والله يبارك في عمرك حبيبتي ...

    بيكفيني كلامك شهاده ليا والله

    منوراني كتييييير على فكره
    ^_^

    ردحذف
  20. شمس النهار ...

    هلا بست الستات ..

    الله يبارك فيكي يارب

    وبشكرك كتير
    والحمدلله إنه عجبك
    وربنا يتقبل منك يااااارب

    تحيه ملونه لعيونك
    ^_^

    ردحذف
  21. الشاعر أحمد فتحي ...

    هلا والله بشاعرنا

    ربنا يخليك وربنا يسعدك ياااارب
    وأقرا ليك مش ديوان واحد بل دواوين قووول أمييين ...

    وكلامنك كتير صح على فكره
    ربنا يهدينا يااااارب

    نورتني
    تحياتي لك أخي
    ^_^

    ردحذف
  22. أم الخلود

    اللهم أميييين

    بشكرك كتير على أحلى كلام من أحلى قلب

    نورتيني
    ^_^

    ردحذف
  23. Ms Venus ...

    يشكرك على أحلى ورده ...

    والله يباركلي فيكي يارب
    وكل سنه وإنتي طيوبه
    وخواتم مباركه

    ربنا يخليكي ليا

    تحيه ملونه لقلبك
    ^_^

    ردحذف
  24. رحاب صالح ...

    حووووبه حبيبة قلبي من جوه
    إنتي تعلقي الوقت إللي تحبيه ولا يهمك
    ومعلش أنا عارفه إن مدونتي تعباكي حبتين
    يمكن بتحب تناغشك شويه هههههههههه

    والله يبارك فيكي .. والله فرحتي بتكمل بوقوفك جنبي دايما ... ربنا يخليكي ليا ...

    وعزومة تاني يوم العيد والله بتمنى أجي .. بس إدعيلي .. ربنا يسهل .. لأن بجد أنا نفسي أكررها وأجي عندك .. أنا حبيت بلطيم أوووووي ... يمكن عشان إنتي فيها :)

    أحلى تحيه ملونه لعيونك الحلوين
    ^_^

    ردحذف
  25. بحر الألوان ..

    هلا بمعتز والله ...

    الله يبارك فيك يارب
    وربنا يوفقنا جميعا اللهم أمين
    بشكرك كتير
    ^_^

    ردحذف
  26. شيماء ...

    شوشو حبيبتي
    الله يبارك فيكي يااااااارب

    يااااااه وبجد دعوتك كتير حلوه ربنا يحققها يارب
    وربنا يحققلك مرادك إنتي كمان

    وكل سنه وإنتي طيوبه وبصحه وسلامه
    وخواتم مباركه
    ^_^

    ردحذف
  27. ياعم انا صايم صايم
    للاسف ربنا ما يقطعها عادة
    بس خلى بالك الانسان بيهدى ويصالح باقى الخلق فى اقل من ثانية

    ردحذف
  28. مبروك زيارة اولي للمدونة علي خبر جميل
    دمتي مبدعة
    تحياتي الخالصة

    ردحذف
  29. صوت من مصر ..

    هلا كيمو باشا :)

    كلنا صايمين والله ومش بنطيق نفسنا ساعات
    بس ضروري نتحكم شويه ماينفعش كده

    بس جملتك الأخيره دي فعلا بتحصل كتير

    نورتني ..
    ^_^

    ردحذف
  30. سندباد ...

    الله يبارك في عمرك يارب ..

    وجهك حلو عليا .. شوفت بقى
    :))

    بشكرك كتير ...

    وإن شاء الله في تواصل
    نورتني
    ^_^

    ردحذف
  31. ازيك غادة اخبارك اية

    كل سنة وانتى طيبة

    مع خالص تحياتى

    ردحذف
  32. الف الف مبروك والى مزيد من النجاح

    ردحذف
  33. كل عام وانتم بخير بمناسبة عيد الفطر المبارك

    ردحذف
  34. تامر نبيل ...

    هلا والله بحضرتك
    أنا الحمدلله بخير

    كل سنه وحضرتك طيب وبخير
    وعيد سعيد عليك
    :)

    نورتني
    ^_^

    ردحذف
  35. عمرو يسري ..

    الله يبارك فيك يارب

    بشكرك كتير
    ^_^

    ردحذف
  36. بحر الألوان ..

    هلا معتز

    كل سنه وإنت طيب يارب
    وإلى الله أقرب
    ربنا يعودها عليك أيام

    ^_^

    ردحذف
  37. مبروك النشر ياغادة

    وخلى بالك ده حال كل المصريين

    لما بيكونوا صايمين


    عيد سعيد

    تحياتى

    ردحذف