إتنشرلي مقال في اليوم السابع ودنيا الرأي كمااااان :)

أنا صايم ومش طايق نفسي ..

ـــــــــــــــــــــــــــــــــــــ

.

" أنا صايم .. وماحدش يكلمنى " ...
" ماتخلينيش افطر عليك " ...
" ياأبن ال ....... إستغفر الله العظيم .. اللهم إنى صائم "...

وغيرها من الأقوال والكلمات الخارجه عن السيطره اللى بنسمعها فى الشهر الفضيل ( شهر رمضان ) .
كلنا بنستنى الشهر ده بفارغ الصبر بما فيه من الإكثار من ذكر الله وقراءه القرآن وبما يأتى به من الخير والبركات ...
بس إحنا للأسف بنحوله أحيانا ً لشهر الخناقات والحوادث والشتائم كمان ... وكل ده بحجة " إن إحنا صايمين .. ومش طايقين نفسنا " ...

أكتر أيام الشهر ده بالذات بصحى على صوت خناقه فى الشارع سواء بين أصحاب المحلات وزباينهم أو بين أى إتنين فى الشارع ... وبيبقى سبب المشكله تافه ولا يذكر وكأنه طقس من طقوس رمضان ... وكل ده طبعا ً بحجة " أنا صايم .. ومش طايق نفسي " ...

ونيجي عند سواقين الميكروباص ... ده السواق منهم وهو صايم تلاقيه بيتخانق مع ( دبان وشه ) ... وأقل كلمه ممكن يقولها أى راكب غلبان بعفويه ومن غير قصد ممكن تخلى السواق يقلب الميكروباص بللى فيه .. لدرجه إنى كل مره بحمد ربنا لخروجى من العربيه سالمه وعلى قيد الحياه ... وكل ده برضو بحجة " أنا صايم .. ومش طايق نفسي " ...
وللأسف بيحصل كل ده فى الشهر الكريم ... ده غير الحوادث اللى بتحصل بسبب الإستعجال ... اللى عايز يلحق الفطار واللى مش عارفه وراه إيه ..؟! , وقت الصيام ده بتبقى الناس عامله زى القنابل الموقوته اللى ممكن تنفجر فى وجه اللى يفكر يقربلها ... يعنى من الأخر كده كل واحد يلزم بيته أسلمله ...

متى سندرك أن رمضان هو شهر الصوم والصبر ... شهر الرحمه والموده بين الناس وشهر الكلمه الجميله والمعامله الحسنه وليس الألفاظ والأفعال التى لا تتقبلها حواسنا فاتؤذينا ...

فعن أبي هريرة رضي الله عنه أن رسول الله صلى الله عليه وسلم قال : الصيام جنة , فلا يرفث ولا يجهل , وإن امرؤ قاتله أو شاتمه , فليقل إني صائم - مرتين - والذي نفسي بيده لخلوف فم الصائم أطيب عند الله تعالى من ريح المسك يترك طعامه وشرابه وشهوته من أجلي الصيام لي وأنا أجزي به والحسنة بعشر أمثالها ...
رواه البخارى ..
اللهم أهدينى وأهدي جميع المسلمين ... اللهم أمين ...

بقلم غاده محسن

^_^

.......................

نشر المقال في اليوم السابع

http://www.youm7.com/News.asp?NewsID=269781&SecID=190&IssueID=0

كما نشر في دنيا الرأي

http://pulpit.alwatanvoice.com/articles/2010/08/24/207842.html

.............................

بعتذر على التقصير الفظيييييييييع

كلام عن كله .. :)

.

السلام عليكم يامدونيين الخير .. :)

إيش أخباركم كلكم ..؟ بجد وحشتوووووني كتيييييير ..

أنا حاسه إني إنقطعت عن عالم التدوين لمدة قرن مش شهر ونص بس .. :(

بجد في كتييييير واحشني أقرا كلماتهم وأعرف أخبارهم من خلال حروفهم وتعليقاتهم ...

في البعض متواصله معاهم في الفيس بوك تخاطيف تخاطيف كده ...

..

وإنقطاعي ده كان بسبب إمتحاناتي إللي أخييييرا خلصت وتقريبا خلّصت عليا ...

اليوم هو أول أيام أجازتي أخيرا >>> في كتييييير هايقولوا هو إنتي لسه فاكره تأجزي :)))

معاهم حق .. الناس أجزت وشبعت أجازه وأنا وأختي وزمايلي لسه فاكرين ...

يلا كله منك ياتعليييييم يامفتوووووووووح ...

بس بجد حااااااااااااسه إني حــــــره ...

حاسه إني عامله زي البنوته إللي أنا حاطه صورتها دي

وهاعمل في الاجازه دي إللي ماتعملش

ربنا يقدرني إن شاااااء الله :)

..

بس أيام إمتحاناتي إستفدت منها حبتين ...

عشان أحيانا الإلهام مش بيجي وبينقح عليا إلا ايام المذاكره >>> فشل فشل يعني :)))

فكتبت كذه حاجه بس لسه عايزلها تعديل .. فدعواتكم بقى :)

..

كاااان نفسي أصيّف .. أو بالأصح اشوف البحر بس شكلي مش هالحق :(

مع إني روحت عند رحاب حبيبتي ( حياتي .. لكن مش حره فيها ) في بلطيم قبل الإمتحانات بكم يوم

وودتني عند البحر وردت فيّا الروح .. بس برضوووووو مش كفايه أنا عايزه أقعد قدامه يجي شهر ماتحركش ...

..

أه صحيح .. كل سنه وإنتم طيبين بمناسبة حلول الشهر الكريم ...

ربنا يملي حياتنا بالخير .. اللهم أمين ... :)

..

في ناس من المدونيين واحشاااااااااني كتير كتير ...

وفي ناس الصراحه زعلانه منهم كتير كتير

وفي ناس عايزه أتعرف على مدوناتهم أكتر وأكتر ...

..

أنا بعتذر على عدم الرد على التعليقات في البوست السابق لإنشغالي ...

بس بجد بشكركم كلكم ...

مستر بريزيدنت .. صدفه جميله .. همس الاحباب .. لولا وزهراء

أم الخلود .. تيرز .. تامر نبيل .. دكتور محمد علي .. مس فينوس

الشاعر أحمد فتحي .. حنين .. شيماء .. رحاب .. سلسبيل

صوت من مصر .. ممكن .. وجايده العزيزي ...

وطبعا بشكر كمان كل إللي قرا ومعلقش ... :)

..

دعواتكم بقى يامدونيين الخير إن نتيجتي تبقى مُشرفه يااااااااارب

ونتيجة أختي وزمايلي كماان اللهم أمين ...

لحسن أنا خايفه أوووووووي .. مع إن نتيجيتي بمكن تظهر بعد العيد

يعني أكون نسييت الإمتحانات وإللي إمتحنتوا :)))

ربنا يستر بقى ...

..

متهيألي .. كفايه رغي كده ...

ولو إفتكرت حاجه ماقولتهاش هنا .. هابقى اقولهالكوا ماتقلقوش :))

ربنا يسعد قلوبكم جميعا .. اللهم أمييين

^_^ .. ^_^